ಜೂಗನಹಳ್ಳಿಯಲ್ಲಿ ಇತಿಹಾಸ ಪುನರ್ ಸ್ಥಾಪನೆ: 150 ವರ್ಷಗಳ ಹಳೆಯ ಶ್ರೀ ಕೋದಂಡರಾಮ ದೇವಾಲಯ ಪುನರುತ್ಥಾನ

ಬೆಂಗಳೂರು: ರಾಜಾಜಿನಗರ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಗೆ ಬರುವ ಜೂಗನಹಳ್ಳಿಯಲ್ಲಿ ಇಂದು ಸಂಭ್ರಮದ ವಾತಾವರಣ ಮನೆಮಾಡಿದೆ. ಸುಮಾರು 200 ವರ್ಷಗಳ ಸುದೀರ್ಘ ಇತಿಹಾಸವಿರುವ ಈ ಗ್ರಾಮದ ಆರಾಧ್ಯ ದೈವ ಶ್ರೀ ಕೋದಂಡರಾಮ ಸ್ವಾಮಿಯ ಭವ್ಯ ಕಲ್ಲಿನ ದೇವಾಲಯವು ನೂತನವಾಗಿ ನಿರ್ಮಾಣಗೊಂಡಿದ್ದು, ಲೋಕಾರ್ಪಣೆಗೆ ಸಜ್ಜಾಗಿದೆ.

ಈ ಐತಿಹಾಸಿಕ ಪುಣ್ಯ ಕಾರ್ಯದಲ್ಲಿ ಮಾಜಿ ಸಚಿವರು ಹಾಗೂ ಶಾಸಕರಾದ ಎಸ್. ಸುರೇಶ್ ಕುಮಾರ್ ಅವರು ಪಾಲ್ಗೊಂಡು, ದೇವಾಲಯದ ಇತಿಹಾಸ ಮತ್ತು ಗ್ರಾಮಸ್ಥರ ಭಕ್ತಿಯನ್ನು ಕೊಂಡಾಡಿದರು.

ಪ್ಲೇಗ್ ಮಾರಿ ಕಳೆದ ನಂತರ ನಿರ್ಮಾಣಗೊಂಡಿದ್ದ ದೇವಗುಡಿ

ಜೂಗನಹಳ್ಳಿಯ ಇತಿಹಾಸ ರೋಚಕವಾದುದು. 1890ರಲ್ಲಿ ಬೆಂಗಳೂರನ್ನು ಬೆಚ್ಚಿಬೀಳಿಸಿದ್ದ ಪ್ಲೇಗ್ ಮಹಾಮಾರಿಯ ಭೀತಿ ಕಳೆದ ನಂತರ, ಅಂದಿನ ಗ್ರಾಮದ 50-60 ಮನೆಗಳ ಜನರು ಒಗ್ಗೂಡಿ ಊರಿನ ಪಟೇಲರು ನೀಡಿದ ಜಾಗದಲ್ಲಿ ಶ್ರೀ ಕೋದಂಡರಾಮ ದೇವಾಲಯವನ್ನು ನಿರ್ಮಿಸಿದ್ದರು. 150 ವರ್ಷಗಳ ಇತಿಹಾಸ ಹೊಂದಿದ್ದ ಆ ದೇವಸ್ಥಾನ ಇತ್ತೀಚೆಗೆ ಶಿಥಿಲಗೊಂಡಿದ್ದರಿಂದ, ಇದೀಗ ಅದೇ ಜಾಗದಲ್ಲಿ ಭವ್ಯವಾದ ಕಲ್ಲಿನ ದೇವಾಲಯವನ್ನು ನಿರ್ಮಿಸಲಾಗಿದೆ.

ಯುವಶಕ್ತಿ ಮತ್ತು ಹಿರಿಯರ ಪರಿಶ್ರಮದ ಫಲ

ಹಿರಿಯರಾದ ಹನುಮಂತಪ್ಪ, ರಾಮಕೃಷ್ಣಪ್ಪ, ಶ್ರೀ ನಾಗರಾಜ್, ಶ್ರೀ ಬಚ್ಚಣ್ಣನವರ ಮಾರ್ಗದರ್ಶನ ಹಾಗೂ ಜಯಪ್ರಕಾಶ್ ಸೇರಿದಂತೆ ಅನೇಕ ಯುವಕರ ನಿರಂತರ ಪರಿಶ್ರಮದಿಂದ ಈ ಸುಂದರ ಕಲಾಕೃತಿಯಂತಹ ದೇವಾಲಯ ಎದ್ದು ನಿಂತಿದೆ.

ನೂತನ ಪ್ರತಿಮೆಗಳು: ಗರ್ಭಗುಡಿಯಲ್ಲಿ ಶ್ರೀ ಕೋದಂಡರಾಮ, ಸೀತಾದೇವಿ, ಲಕ್ಷ್ಮಣ, ಆಂಜನೇಯ ಸ್ವಾಮಿಯ ಜೊತೆಗೆ ರಾಜರಾಜೇಶ್ವರಿ ಹಾಗೂ ವಿನಾಯಕನ ಹೊಸ ಪ್ರತಿಮೆಗಳನ್ನು ಪ್ರತಿಷ್ಠಾಪಿಸಲಾಗುತ್ತಿದೆ.

ಧಾರ್ಮಿಕ ವಿಧಿವಿಧಾನ: ಕಳೆದ ಮೂರು ದಿನಗಳಿಂದ ದೇವಸ್ಥಾನದಲ್ಲಿ ವಿವಿಧ ಹೋಮ-ಹವನಗಳು ನಿರಂತರವಾಗಿ ನಡೆಯುತ್ತಿವೆ.

ಕುಂಭಾಭಿಷೇಕ: ಶನಿವಾರ ಹರಿಹರಪುರದ ಪೂಜ್ಯ ಸ್ವಾಮೀಜಿಗಳ ದಿವ್ಯ ಸಾನಿಧ್ಯದಲ್ಲಿ ಮಹಾ ಕುಂಭಾಭಿಷೇಕ ನೆರವೇರಲಿದೆ.

ಸೊಗಡು ಮರಳಿದ ಜೂಗನಹಳ್ಳಿ

ದೇವಾಲಯದ ಮುಖ್ಯ ಅರ್ಚಕರು ತಮ್ಮ ತಾತ ಶೇಷ ಭಟ್ಟರ ಕಾಲದ ಇತಿಹಾಸವನ್ನು ಸ್ಮರಿಸುತ್ತಿದ್ದರೆ, ಇಡೀ ಗ್ರಾಮಕ್ಕೆ 150 ವರ್ಷಗಳ ಹಿಂದಿನ ಆ ಸಡಗರ ಮರಳಿದಂತಿತ್ತು. ಇಂದು ಒಂದು ಸಾವಿರಕ್ಕೂ ಹೆಚ್ಚು ಮನೆಗಳಿರುವ ಜೂಗನಹಳ್ಳಿಯ ಪ್ರತಿಯೊಂದು ಮನೆಯಲ್ಲೂ ಹಬ್ಬದ ವಾತಾವರಣ ಮನೆಮಾಡಿದೆ.