admin
ಬೆಂಗಳೂರು: ಕರ್ನಾಟಕವನ್ನು ದೇಶದ ರಕ್ಷಣಾ ಎಲೆಕ್ಟ್ರಾನಿಕ್ ಉತ್ಪನ್ನಗಳ ಉತ್ಪಾದನಾ ರಾಜಧಾನಿಯನ್ನಾಗಿ (Defense Electronics Capital of India) ರೂಪಿಸಲು ರಾಜ್ಯ ಸರ್ಕಾರ ಸನ್ನದ್ಧವಾಗಿದೆ. ಬೆಂಗಳೂರಿನ ಇನ್ವೆಸ್ಟ್ ಕರ್ನಾಟಕ ಫೋರಂ (IKF) ಕಚೇರಿಯಲ್ಲಿ ನಡೆದ ಏರೋಸ್ಪೇಸ್ ಮತ್ತು ಡಿಫೆನ್ಸ್ ವಿಷನ್ ಗ್ರೂಪ್ ಸದಸ್ಯರ ಮಹತ್ವದ ಸಭೆಯಲ್ಲಿ ಸಚಿವ ಎಂ.ಬಿ. ಪಾಟೀಲ್ ಈ ಘೋಷಣೆ ಮಾಡಿದ್ದಾರೆ.
“ದೇಶದ ಒಟ್ಟು ಏರೋಸ್ಪೇಸ್ ಮತ್ತು ರಕ್ಷಣಾ ಉತ್ಪಾದನೆಯಲ್ಲಿ ಕರ್ನಾಟಕ ಈಗಾಗಲೇ ಶೇ. 65 ಕ್ಕೂ ಹೆಚ್ಚು ಕೊಡುಗೆ ನೀಡುತ್ತಿದೆ. ನಮ್ಮ ಮುಂದಿನ ಗುರಿ ಕರ್ನಾಟಕವನ್ನು ವಿಶ್ವದ ರಕ್ಷಣಾ ಉತ್ಪಾದನಾ ಭೂಪಟದಲ್ಲಿ ಅಗ್ರಸ್ಥಾನಕ್ಕೆ ತರುವುದಾಗಿದೆ.”
ಸಭೆಯ ಪ್ರಮುಖ ನಿರ್ಧಾರಗಳು ಮತ್ತು ಮುಖ್ಯಾಂಶಗಳು:
೧. ಬೃಹತ್ ಡಿಫೆನ್ಸ್ ಎಲೆಕ್ಟ್ರಾನಿಕ್ಸ್ ಪಾರ್ಕ್ ಸ್ಥಾಪನೆ: ರಾಜ್ಯದಲ್ಲಿ ರಕ್ಷಣಾ ಉತ್ಪಾದನೆಗೆ ಬೂಸ್ಟ್ ನೀಡಲು 200 ಎಕರೆ ವಿಸ್ತೀರ್ಣದಲ್ಲಿ ಡಿಫೆನ್ಸ್ ಎಲೆಕ್ಟ್ರಾನಿಕ್ಸ್ ಪಾರ್ಕ್ ಹಾಗೂ 100 ಎಕರೆಯಲ್ಲಿ ಏವಿಯಾನಿಕ್ಸ್ ಮತ್ತು ಸೆನ್ಸರ್ ಪಾರ್ಕ್ ಸ್ಥಾಪಿಸಲು ಉದ್ದೇಶಿಸಲಾಗಿದೆ. ವಿಶೇಷ ಹೂಡಿಕೆ ವಲಯ (SIR) ಅಸ್ತಿತ್ವಕ್ಕೆ ಬಂದ ತಕ್ಷಣ ಈ ಯೋಜನೆಗಳು ಕಾರ್ಯಗತಗೊಳ್ಳಲಿವೆ.
೨. ಎರಡು ರಕ್ಷಣಾ ಕಾರಿಡಾರ್ಗಳಿಗೆ (Defence Corridors) ಒತ್ತಾಯ: ಕರ್ನಾಟಕದ ಆರ್ಥಿಕತೆಗೆ ವೇಗ ನೀಡಲು ರಾಜ್ಯದ ಎರಡು ಆಯಕಟ್ಟಿನ ಭಾಗಗಳಲ್ಲಿ ಡಿಫೆನ್ಸ್ ಕಾರಿಡಾರ್ ಸ್ಥಾಪಿಸಲು ಕೇಂದ್ರ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿದೆ:
ಉತ್ತರ ಕರ್ನಾಟಕ: ಹುಬ್ಬಳ್ಳಿ – ಧಾರವಾಡ – ಬೆಳಗಾವಿ – ವಿಜಯಪುರ ಭಾಗ.
ದಕ್ಷಿಣ ಕರ್ನಾಟಕ: ಬೆಂಗಳೂರು ಉತ್ತರ – ಚಿಕ್ಕಬಳ್ಳಾಪುರ – ಕೋಲಾರ ಭಾಗ. (ಸಭೆಯಲ್ಲಿ ಉದ್ಯಮಿಗಳು ಬೆಂಗಳೂರು-ಮೈಸೂರು ನಡುವೆಯೂ ಕಾರಿಡಾರ್ ಘೋಷಿಸುವಂತೆ ಮನವಿ ಮಾಡಿದರು).
೩. “ಬಿಯಾಂಡ್ ಬೆಂಗಳೂರು” ಮತ್ತು ವೈಮಾನಿಕ ಅಭಿವೃದ್ಧಿ: ಬೆಂಗಳೂರಿನ ಹೊರತಾಗಿಯೂ ರಾಜ್ಯದ ವಿವಿಧೆಡೆ ಕೈಗಾರಿಕಾ ವಿಕೇಂದ್ರೀಕರಣಕ್ಕೆ ಸರ್ಕಾರ ಒತ್ತು ನೀಡಿದೆ. ವಿವಿಧ ಜಿಲ್ಲೆಗಳಲ್ಲಿ ಹೊಸ ವಿಮಾನ ನಿಲ್ದಾಣಗಳ ನಿರ್ಮಾಣಕ್ಕೆ ಭೂಮಿ ಒದಗಿಸಲು ಸರ್ಕಾರ ಬದ್ಧವಾಗಿದ್ದು, ಇದು ಪ್ರಾದೇಶಿಕ ಸಮತೋಲಿತ ಅಭಿವೃದ್ಧಿಗೆ ಪೂರಕವಾಗಲಿದೆ.
೪. ಫ್ಲೈ-ಟ್ಯಾಕ್ಸಿ (Fly-Taxi) ತಂತ್ರಜ್ಞಾನ: ಜಪಾನ್ನಲ್ಲಿ 2028ರ ವೇಳೆಗೆ ಸುಜುಕಿ ಮತ್ತು ಟೊಯೋಟಾ ಸಂಸ್ಥೆಗಳು ಏರಿಯಲ್ ಟ್ಯಾಕ್ಸಿ ಸೇವೆ ಆರಂಭಿಸಲಿದ್ದು, ಇದಕ್ಕೆ ಬೇಕಾದ ಎಲೆಕ್ಟ್ರಿಕಲ್ ಉಪಕರಣಗಳನ್ನು ಬೆಂಗಳೂರಿನ ‘ಸಾಸ್ಮೋಸ್’ (Sasmos) ಕಂಪನಿ ಪೂರೈಸುತ್ತಿದೆ. ಇದೇ ಮಾದರಿಯ ‘ಫ್ಲೈ-ಟ್ಯಾಕ್ಸಿ’ ಸೇವೆಯನ್ನು ಕರ್ನಾಟಕದಲ್ಲೂ ಜಾರಿಗೆ ತರಲು ಪೂರಕ ನೀತಿ ರೂಪಿಸುವ ಬಗ್ಗೆ ಸಚಿವರು ಸಕಾರಾತ್ಮಕವಾಗಿ ಸ್ಪಂದಿಸಿದರು.
ಕೈಗಾರಿಕಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಎಸ್. ಸೆಲ್ವಕುಮಾರ್, ಆಯುಕ್ತೆ ಗುಂಜನ್ ಕೃಷ್ಣ, ಹಾಗೂ ಪ್ರಮುಖ ಉದ್ಯಮಿಗಳಾದ ಅಪ್ಪಾರಾವ್ ವೆಂಕಟ ಮಲ್ಲವರಪು (ಸೆಂಟ್ರಂ ಎಲೆಕ್ಟ್ರಾನಿಕ್ಸ್), ಜೀವಿಶ್ ಗುರುಮೂರ್ತಿ (ಹನಿವೆಲ್), ಜೆ.ಎಸ್. ಗವಣಕರ್ (ಸ್ಯಾಫ್ರಾನ್), ಮತ್ತು ಡಾ. ಎಸ್. ದ್ವಾರಕಾನಾಥ್ (AIA) ಸೇರಿದಂತೆ ವಿಷನ್ ಗ್ರೂಪ್ನ ಹಲವು ಸದಸ್ಯರು ಭಾಗವಹಿಸಿ ತಮ್ಮ ಅಮೂಲ್ಯ ಸಲಹೆಗಳನ್ನು ನೀಡಿದರು.
