admin
ಮಡಿಕೇರಿ: ಕ್ಷುಲ್ಲಕ ಕಾರಣಕ್ಕೆ ನಡೆದ ಜಗಳವೊಂದು ಕೊಲೆಯಲ್ಲಿ ಅಂತ್ಯವಾಗಿ, ಸಾಕ್ಷ್ಯ ನಾಶಪಡಿಸಲು ಮೃತದೇಹವನ್ನೇ ಸುಟ್ಟು ಹಾಕಿದ ಘಟನೆ ಮಡಿಕೇರಿ ಗ್ರಾಮಾಂತರ ಪೊಲೀಸ್ ಠಾಣಾ ವ್ಯಾಪ್ತಿಯ ಕಟ್ಟೆಮಾಡು ಗ್ರಾಮದಲ್ಲಿ ನಡೆದಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಮೃತರ ಮಗ ಸೇರಿದಂತೆ ಒಟ್ಟು ಎಂಟು ಜನರನ್ನು ಬಂಧಿಸಿದ್ದಾರೆ.
ಘಟನೆಯ ಹಿನ್ನೆಲೆ:
ಕಟ್ಟೆಮಾಡು ನಿವಾಸಿಯಾದ ದೇವಯ್ಯ ಎಂಬುವವರ ತೋಟದ ಲೈನುಮನೆಯಲ್ಲಿ ಬುರೋ ಎಂಬುವವರು ವಾಸವಿದ್ದರು. ಜನವರಿ 11ರಂದು ರಾತ್ರಿ ಬುರೋ ಮತ್ತು ಅವರ ಮಗ ಪ್ರಶಾಂತ್ ಮುದಿ ಇಬ್ಬರೂ ಮದ್ಯಪಾನ ಮಾಡಿದ್ದರು. ಈ ವೇಳೆ ಇಬ್ಬರ ನಡುವೆ ಸಣ್ಣ ವಿಷಯಕ್ಕೆ ಗಲಾಟೆ ನಡೆದಿದ್ದು, ಕುಡಿದ ಮತ್ತಿನಲ್ಲಿದ್ದ ಪ್ರಶಾಂತ್ ತನ್ನ ತಂದೆಯ ಮೇಲೆ ದೊಣ್ಣೆಯಿಂದ ಮನಬಂದಂತೆ ಹಲ್ಲೆ ನಡೆಸಿದ್ದಾನೆ. ತೀವ್ರವಾಗಿ ಗಾಯಗೊಂಡ ಬುರೋ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.
ಸಾಕ್ಷ್ಯ ನಾಶಕ್ಕೆ ಮೃತದೇಹ ದಹನ:
ಕೊಲೆಯಾದ ಬಳಿಕ ವಿಷಯವನ್ನು ಮರೆಮಾಚಲು ಆರೋಪಿಗಳು ಮೃತದೇಹವನ್ನು ಸುಟ್ಟು ಹಾಕಿ ಸಾಕ್ಷ್ಯ ನಾಶಪಡಿಸಲು ಯತ್ನಿಸಿದ್ದಾರೆ. ಈ ಬಗ್ಗೆ ಮಾಹಿತಿ ಲಭಿಸಿದ ಪೊಲೀಸರು ಜನವರಿ 13ರಂದು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದರು.
ಸ್ಥಳಕ್ಕೆ ಹಿರಿಯ ಅಧಿಕಾರಿಗಳ ಭೇಟಿ:
ಘಟನಾ ಸ್ಥಳಕ್ಕೆ ಮಡಿಕೇರಿ ಡಿಎಸ್ಪಿ ಶ್ರೀ ಸೂರಜ್ ಪಿ.ಎ, ಇನ್ಸ್ಪೆಕ್ಟರ್ ಚಂದ್ರಶೇಖರ್ ಹೆಚ್.ವಿ, ಪಿಎಸ್ಐ ಜವರೇಗೌಡ ಮತ್ತು ಅಪರಾಧ ಕೃತ್ಯ ಪರಿಶೀಲನಾ ತಜ್ಞರ ತಂಡ ಭೇಟಿ ನೀಡಿ ಅಗತ್ಯ ಸಾಕ್ಷ್ಯಾಧಾರಗಳನ್ನು ಕಲೆ ಹಾಕಿದ್ದರು. ತನಿಖೆಯ ವೇಳೆ ಮಗನೇ ತಂದೆಯನ್ನು ಕೊಂದಿರುವುದು ಮತ್ತು ಉಳಿದವರು ಸಾಕ್ಷ್ಯ ನಾಶಕ್ಕೆ ಸಹಕರಿಸಿರುವುದು ಬೆಳಕಿಗೆ ಬಂದಿದೆ.
ಬಂಧಿತ ಆರೋಪಿಗಳ ವಿವರ:
ಪೊಲೀಸರು ಜನವರಿ 14ರಂದು ಈ ಕೆಳಕಂಡ ಎಂಟು ಮಂದಿಯನ್ನು ಬಂಧಿಸಿದ್ದಾರೆ:
- ಪ್ರಶಾಂತ್ ಮುದಿ (27) – ಮುಖ್ಯ ಆರೋಪಿ (ಮಗ)
- ದೇವಯ್ಯ ಎಂ.ಎಸ್ (71)
- ಭಾರತಿ ಎಂ.ಡಿ (57)
- ಶ್ರೀಕಾಂತ್ ಮುದಿ (25)
- ಸುಧನ್ ಮುದಿ (50)
- ಲಕ್ಷ್ಮೀ ಮುದಿ (37)
- ತನುಶ್ರೀ (20)
- ಬಸಂತಿ ಮುದಿ (49)
ಬಂಧಿತರ ಮೇಲೆ ಬಿಎನ್ಎಸ್ ಆಕ್ಟ್ನ ಕಲಂ 103(1), 238, 239, 3(5) ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಪೊಲೀಸ್ ತಂಡಕ್ಕೆ ಶ್ಲಾಘನೆ:
ಅತಿ ವೇಗವಾಗಿ ಪ್ರಕರಣವನ್ನು ಭೇದಿಸಿ ಆರೋಪಿಗಳನ್ನು ಬಂಧಿಸಿದ ಪೊಲೀಸ್ ತಂಡವನ್ನು ಕೊಡಗು ಜಿಲ್ಲಾ ಪೊಲೀಸ್ ಅಧೀಕ್ಷಕರಾದ ಕು| ಬಿಂದು ಮಣಿ ಆರ್.ಎನ್ ಮತ್ತು ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಬಿ.ಪಿ. ದಿನೇಶ್ ಕುಮಾರ್ ಅವರು ಶ್ಲಾಘಿಸಿದ್ದಾರೆ.
